Къурмэныр

Posted by Cherenqo

Ислъам диным имэфэкI лъапIэу Къурмэныр шэкIо­гъум и 16-м быслъымэнхэм хагъэ­унэфыкIыгъ. Хабзэ зэрэхъ­у­гъэу, зэрифэшъуашэу мэфэ­кIыр Адыгеими щы­кIуагъ.


Къурмэн пчэдыжьым Мые­къопэ гупчэ мэщытым цIыф лъэпкъ зэфэшъхьафыбэхэм ялIыкIохэр къыщызэрэугъоигъэх. ТхьэшIошъхъуныгъэ зиIэу Къурмэн мэфэкIышхом ипчэдыжь нэмаз мэщытым щызышIынэу къекIолIа­гъэ­хэм къафэгушIонхэу мыщ къэкIуа­гъэх Адыгэ Республикэм и Президентэу ТхьакIу­щынэ Аслъан, АР-м и Премьер-министрэу КъумпIыл Мурат, политическэ партиеу «Единэ Россием» и Адыгэ шъолъыр къутамэ и Секретарэу Iэщэ Мухьамэд, АР-м и Къэралыгъо Совет — Хасэм идепутатхэр, министрэхэр, нэмыкIхэри.

Ислъам диныр зылэжьыхэрэм зэкIэми ямэфэкI пае игуа­пэу къафэгушIуагъ Адыгеим ыкIи Пшызэ шъолъыр ащыпсэурэ быслъымэнхэм ямуфтиеу Емыж Нурбый. Яунагъохэм псауныгъэ пытэ арылъэу, цIыф лъэпкъ зэфэшъхьафхэу республикэм исхэр зэгурыIоны­гъэм, мамырныгъэм ягъогу тапэкIи темыкIхэу зэдэпсэунхэу къа­фэлъэIуагъ.

— ШъуинэкI нэмазхэри, шъуитхьэлъэIухэри, шъуи­шIушIэ сэдэкъэ пстэури Алахьым къабыл шъуфе­шIых, — къыIуагъ Емыж Нурбый быс­лъы­мэнхэм зафи­гъазэзэ.

Урысые Федерацием и Премьер-министрэу Владимир Путиным, тикъэралыгъо ишъолъыр зэфэшъхьафхэм, Темыр Кавказым хэхьэрэ су­бъек­тхэм къарыкIы­гъэ телеграммэхэу республикэм щыпсэурэ быслъымэнхэм къазы­щы­фэ­гушIохэрэм муфтиир къяджагъ.

Нэужым гущыIэ зы­штэ­гъэ ТхьакIущынэ Аслъан мэфэкIыр хэзыгъэунэфы­кIы­хэрэм зэ­кIэми къа­фэ­гушIуагъ. Непэ Адыгеим дин ыкIи лъэпкъ зэхэдз имылъэу, цIыф­хэр зэгурыIохэу зэрэщызэдэпсэухэрэр анахь мэхьанэшхо зиIэ лъэныкъохэм ащыщэу республикэм ипащэ къыгъэ­нэфагъ. Тишъолъыр имыза­къоу, зэрэдунаеу щыпсэурэ быс­лъымэн пстэуми яуна­гъохэм щыIэкIэ-псэукIэ дэгъу ары­лъынэу, дэхагъэм, лъэпкъ зэгу­рыIоныгъэм фэзыпIухэрэ ислъам диным фэлэжьэнхэ амал яIэнэу Президентыр къафэ­лъэIуагъ.

— Быслъымэн лъапIэхэр, Къурмэным унагъо пэпчъ гу­шIуагъо къышъуфихьынэу, псауныгъэ пытэ шъуиIэу, тиреспубликэ мамырэу, щыIэ­кIэ­шIу илъэу тызэдэпсэунхэу сы­шъуфэлъаIо, — къыIуагъ икIэ­ухым ТхьакIущынэ Аслъан.

ТХЬАРКЪОХЪО Адам.



Сурэтхэр А. Гусевым тырихыгъэх.